《神奇4俠》(Fantastic Four)係Marvel最歷史悠久嘅作品之一，喺1961年11月開始連載，係Marvel世界第一支英雄團隊，甚至比復仇者聯盟眾英雄更早面世。故事講述四個年輕人被送往時空嘅時候受輻射影響，令身體產生巨變，於是四人就用自身超能力肩負守護人類嘅重任，組成「神奇4俠」。雖然《神奇4俠》分別喺2005年同2007年搬上大銀幕，可惜叫座不叫好，電影卡士出色不過劇情空洞，特技又未見突出。於是電影公司決意喺10年後將呢部經典漫畫重拍。
神奇先生 (Mr.Fantastic)
本名Reed Richard，天才科學家，幾乎精通所有領域嘅科學知識。獲得異能後身體變得能屈能伸，手腳可以隨自己思想變咩形狀都得，而且有極強大嘅防禦力，一般物理攻擊又或者爆炸都難傷佢分毫。不過咁，佢又唔係可以無限地伸長，最多都只係1500英尺(約457米)。看似無弱點嘅佢其實係會受溫度影響，高溫或者低溫都會令佢身體嘅彈性削弱甚至消失，喺漫畫入面佢就試過多次因為溫度嘅弱點遇上危機。
隱形女 (The Invisible Woman)
本名Susan Storm，佢能夠控制光波，令自己或者身邊嘅人隱形。另一超能力就係製造巨大力場同能量護盾。喺戰鬥中佢可以用力場操控物品或者困住敵人，護盾就對自己隊友提供有效防禦。
霹靂火 (The Human Torch)
本名Johnny Storm，係隱形女Susan Storm嘅弟弟，個性貪玩得嚟又衝動，算係一個麻煩製造者，經常同其餘三位成員出現磨擦。佢可以全身釋放火焰而且以超音速飛行，漫畫入面佢最勁係可以產生溫度等同於一個新星爆炸嘅熱能，不過大技出一次之後就會消耗佢所有能量，所以電影入面就應該唔會見到。
石頭人 (The Thing)
本名Benjamin Grimm，係一名科學家，亦係神奇先生嘅大學同學。同其他三位主角相比，佢身體嘅外貌完全改變，整個身體變成橙色石頭，人如其名被稱為「石頭人」。佢嘅身體重達千磅、無堅不摧，擁有超人嘅攻擊力同防禦力。
喺漫畫世界佢係少數可以同變形俠醫(Hulk)正面抗衡嘅人物之一，厲害嘅程度可想而知。
1) 神奇先生好似樣？
新舊版神奇先生最大分別其實就只係演員，舊版神奇先生Ioan Gruffudd俾人感覺較成熟同有智慧，好自然有一種領袖嘅風範，演出亦算討好。
而新版演員邁爾斯泰勒(Miles Teller)就感覺年輕得多，憑《鼓動自我》、《分歧者︰異類叛逃》等電影上位嘅佢相貌俊俏之餘亦帶點孩子氣，切合電影希望有嘅年輕感。但其實除咗年齡之外，新舊版神奇先生其實外觀上都極相似，髮型都係似到十足。
2) 隱形女新不如舊？
有唔少人都話隱形女係新不如舊，但無辦法，舊版隱形女係由曾被選為「世上最性感女星」嘅謝茜嘉艾芭(Jessica Alba)飾演，當年只有24歲嘅Jessica青春逼人，着起件緊身制服玲瓏浮凸，真係一舉手一投足都殺死唔少男士。
雖然有位神級索女在前，不過其實今集嘅女主角凱特瑪拉(Kate Mara)都絕對唔差！
今年32歲嘅佢比起當年嘅Jessica可能係老咗啲，但佢喺爆紅劇集《紙牌屋》(《House of Cards》)入面飾演一個不擇手段嘅記者令人留下深刻印象，而且身材一啲都唔失禮。
3) 石頭人唔使大隻？
外觀上，新版石頭人嘅造型明顯細緻得多，岩石嘅紋路同凹凸感強烈，簡單來說就係勁有霸氣！
而演員方面，喺舊版飾演石頭人嘅演員Michael Chiklis其貌不揚，係一位光頭大大隻嘅中年男士，就算未變身都俾到觀眾「石頭人嘅感覺」。反而新版石頭人占美比爾(Jamie Bell)，有唔少人話佢係眾主角中最靚仔嗰個，不過就全套戲中就得好少時間睇到佢嘅真面目。據製作團隊所講，佢哋並唔想搵一個外型大隻粗獷嘅演員演出，而係需要一個交代到石頭人內心世界嘅演員。
4) 霹靂火由白變黑？
相信今次最大變動嘅角色莫過於霹靂火。舊作係由基斯伊雲斯(Chris Evans)飾演，今時今日嘅佢當然已經無人不曉，就係鼎鼎大名嘅「美國隊長」！當年只有24歲嘅佢一臉稚氣又帶點佻皮，成功演活愛惡作劇又性格衝動嘅霹靂火。
美國隊長如今就當然無暇再演《F4》，所以霹靂火亦由白變黑，由黑人男星米高佐敦(Michael B. Jordan)繼承其衣缽。同「籃球之神」米高佐敦同名嘅佢多年來演出過唔少深受好評嘅劇集，亦喺得獎獨立電影《Fruitvale Station》擔正過，相信會俾到大家驚喜。
5) 末日博士大翻身？
末日博士Dr.Doom原名Victor Von Doom，不過喺今集電影佢就叫Victor Domashev。大家喺舊版《神奇4俠》入面見到佢剩係識放電咁無乜料到，不過喺Marvel世界嘅Dr.Doom其實係非常強大嘅反派，除咗係神奇4俠嘅宿敵，亦多次同復仇者聯盟交手，幾乎同所有Marvel英雄都對戰過。
佢擁有超乎常人嘅科學知識(同神奇先生不相伯仲)，又可以魔法力量輕易操控天氣同穿越唔同空間，喺漫畫歷史上曾經奪取多個超級英雄嘅能力(例如Silver Surfer同Scarlet Witch嘅力量都曾被佢偷到手)。而除咗一直戴住嘅鋼鐵面具，Dr.Doom仲有套可以媲美鐵甲奇俠嘅盔甲，所以係超級難對付！且看今集嘅Dr.Doom會唔會吐氣揚眉先。
6) 新舊制服對碰
新版《神奇4俠》制服嘅設計就較有現代感，顏色改為黑色，而且每位主角嘅制服都略有不同，似乎係為佢哋各自嘅異能度身訂造。不過最度身訂造莫過於係石頭人，因為今集講到神奇4俠嘅制服係由國防部設計，目的係要駕馭佢哋嘅力量。反而石頭人只係身體嘅結構改變，唔似其他人會伸縮或者隱形，所以索性由佢乜都唔着。
反之舊版四人嘅制服一式一樣，比較似一件緊身潛水衣，但用色比較貼近漫畫原著，而且亦有標誌性嘅「4」字徽章。雖然整體感覺係新版比舊版好睇，但唯一要挑剔嘅係新版制服上竟然冇咗代表《神奇4俠》嘅「4」字徽章，唔知係唔係電影公司嘅刻意安排呢？
7) 變身情節有變
舊版電影講述四位主角因為飛到太空執行任務嘅時候，因為受到輻射感染所以獲得特殊能力。
不過新作就係話神奇先生成功創造一部遠距離即時傳送儀器，可惜四位主角透過機器穿越去另一個時空嘅時候發生意外，去到一個未知嘅空間，脫險後眾人身體產生異變。整體而言都係差唔多啦！
8) 神奇夫婦未必再現
喺2005年嘅《神奇4俠》，神奇先生同隱形女本為情侶，而續集《銀魔現身》更加係以佢哋嘅婚禮作開頭。不過據今集就未必會提及二人嘅感情線，而且28歲嘅Miles同32歲嘅Kate外型上亦唔太相襯。不過電影公司方面一早都講過今次《神奇4俠》故事係會同原著有出入，所以各位觀眾都無需太介懷。
大家近日睇電影預告片或者海報都會留意到一幕係四俠背向大家，望住天空嘅一束光柱，相信就係「N-zone」嘅入口。「N-zone」係Marvel世界入面經常出現嘅異空間，據知最後有30分鐘大戰嘅高潮位都會喺「N-zone」進行，呢個消息令Marvel大呼過癮！而舊版《F4》嘅激戰情節都係喺大街上進行，跟一般英雄片無異。
