蟻俠 你要知的十個秘密

1) Dr.Hank Pym點止老人家咁簡單？
喺《復仇者聯盟2：奧創紀元》入面出現嘅大反派奧創(Ultron)係由鐵甲奇俠Tony Stark同變形俠醫所創造，但其實原著漫畫入面，Dr.Hank Pym先至係奧創嘅始創者，奧創係佢發明去協助復仇者嘅人工智能。由奧斯卡影帝米高德格拉斯(Michael Douglas)飾演嘅Dr.Pym，喺Marvel世界其實係相當重要嘅角色，佢除咗係權威科學家、第一代蟻俠之外，同時係復仇者聯盟創始成員之一(其餘成員為佢老婆黃蜂女、鐵甲奇俠、雷神奇俠同埋變形俠醫)。

2) 蟻俠除咗縮細仲識變大？
其實電影入面都可以睇到Dr. Pym嘅研究除咗縮細亦可以變大，唔知大家有冇諗點解蟻俠唔將自己變大去對付敵人呢？其實喺漫畫入面嘅劇情早就解答咗大家嘅疑問。由於佢自覺能力比唔上其他有強大異能嘅成員，所以將本來用以縮小的彭氏粒子(Pym particles)用喺巨大化，將自己變成鬼咁大，英雄代號改為巨型人(Giant-Man)，既然蟻俠已經鐵定會出現喺將來嘅Marvel電影，我哋或者都有機會睇到佢巨大化嘅一面。

3) 蟻俠同Yellowjacket其實係同一人？
今集電影嘅反派係Darren Cross，根據電影設定佢係Dr.Pym嘅徒弟，佢自行研發咗一套同蟻俠戰衣相近嘅黃蜂戰衣，同蟻俠大戰連場。不過有趣嘅係原來呢個角色設定同漫畫係完全唔一樣，因為漫畫入面Ant-man同Yellowjacket其實係同一個人！話說Ant-man發現自己唔能夠長時間變大，而且變大後嘅力量仲會削弱，所以就沉醉喺各種實驗希望令自己變強。不過喺一次實驗當中發生意外變得瘋癲，更分裂出另一 個邪惡人格，於是佢就以Yellowjacket嘅身份現身人前。

4) 點解《蟻俠》見唔到其他復仇者聯盟嘅主要角色？
既然蟻俠係復仇者聯盟一員，咁一班復仇者點解喺電影無影呢？原來Dr.Pym已經解釋咗。當蟻俠問Dr.Pym點解唔搵復仇者幫手嘅時候，博士話復仇者正忙緊將一個城市由天空往下丟(Dropping cities out of the sky)，正正就係講緊《復仇者聯盟2》入面，復仇者聯盟同奧創喺空中激戰緊嘅劇情。而且Dr.Pym同Tony Stark嘅爸爸Howard Stark有過牙齒印，令佢唔想同復仇者合作，佢仲取笑Tony Stark嘅鐵甲奇俠戰衣同可以變大縮細嘅蟻俠戰衣比直頭係小兒科！

5) 《蟻俠》入面原來有提過蜘蛛俠？
去到電影末段，又再出現變成急口令咁樣嘅對話，不過呢個有趣嘅演繹方式可能令大家忽略咗說話內容。嗰位靚女同獵鷹勁快咁講咗一堆嘢，其中一句提到我哋當中有一個識跳來跳去、盪來盪去仲會爬牆嘅人(We’ve got a guy who jumps, swings and climbs up walls)，盪來盪去又識爬牆嘅英雄…無錯就係蜘蛛俠(Spider-man)！暗示咗蜘蛛俠將會喺復仇者聯盟嘅電影登場。其實喺漫畫世界入面蜘蛛俠本就係復仇者聯盟嘅一員，不過蜘蛛俠電影嘅版權屬於Sony而非Marvel，所以將來蜘蛛俠喺復仇者電影出現係兩大公司破天荒合作嘅成果，影迷有福了！

6) 尾片預告片1︰第二代黃蜂女將會現身
喺電影中Dr.Pym雖然一直堅持唔俾個女Hope着上蟻俠戰衣上陣。不過喺電影第一段預告中，Dr.Pym帶住Hope去到一間密室，向佢展示重新設計嘅黃蜂女裝備，除咗表達兩父女已經解開心結外，似乎就係暗示Hope將會繼承母親，以黃蜂女(The Wasp)嘅身份出現喺往後嘅Marvel電影。

7) 片尾預告片2︰為《美國隊長3》鋪路
喺電影第二段預告出現嘅都係電影《美國隊長2》嘅角色，提到美國隊長同獵鷹成功搵番冬日戰士Bucky Barnes，不過Bucky似乎仍然係半昏迷狀態，而且一路細細聲叫人幫佢。幫啲咩？相信係要維修Bucky嘅機械手，於是獵鷹就話諗到一個人可以幫手，預告蟻俠將會喺復仇者聯盟電影中再次現身！估計係因為蟻俠講過自己有電子工程碩士資格，唔通係要佢變細入去維修Bucky隻手？

至於點解美國隊長會話因為一啲協議(protocol)唔可以搵Tony Stark幫手，好有可能就係佢同Stark已經鬧翻，為下一集《美國隊長3︰英雄內戰》(《Captain America: Civil War》)鋪路。

8) 題外話1︰美國隊長之死
Bucky再次出現嘅劇情其實係非常重要，因為喺原著漫畫入面，美國隊長Steve Rogers經過英雄內戰事件後決定投降自首。但佢被送往法院受審嘅途中遭暗殺身亡，而Bucky就會接替Steve成為新一代嘅美國隊長。

9) 蟻俠囡囡都係超級英雄？
蟻俠喺電影入面有個囡囡Cassie Lang，蟻俠一直努力都係想保護佢同埋有多啲同佢見面嘅機會。但原來呢個小妹妹除咗好打耳之外，長大之後仲會成為超級英雄Ant Girl！電影末段見到佢咁細個已經同隻巨型蟻打成一片，相信大個實可以同爸爸一樣同蟻群並肩作戰。而佢大個之後係會同其他新生代嘅英雄組成少年復仇者(Young Avengers)。

10) 題外話2︰鷹眼囝囝不能忽視
喺《復仇者聯盟2》入面鷹眼(Hawkeye)將自己剛出世嘅兒子改名為Nathaniel，而Nathaniel就有可能喺未來同Ant Girl一齊成為Young Avengers嘅一員，因為Young Avengers其中一個要員Iron Lad，本名就係叫Nathaniel。